Aurreko artikuluan ezarritakoa betez, Herri Administrazioen Administrazio Prozedura Erkidearen urriaren 1eko 39/2015 Legearen 133, 1, lehenengo tartekia, iragartzen da Anoetako Udala Udal Etxebizitza Tasatua Arautzeko Ordenantza berri bat prestatzen ari dela. Ordenantza horren arrazoiak eta helburuak honako hauek dira:
Euskal Autonomia Erkidegoko Lurzoruari eta Hirigintzari buruzko 2/2006 Legea indarrean sartzearekin batera, prezio tasatuko eta udal erregimeneko etxebizitzen kategoria sortu zen, kategoria berri gisa, babes ofizialeko etxebizitzen barruan. Orain arte, Anoetako udalerriak ez du gai horri buruzko arauketa propiorik izan, indarrean dagoen araudian aurreikusten den bezala.
Etxebizitzari buruzko ekainaren 18ko 3/2015 Legea indarrean sartzeak, beste gogoeta askoren artean, dei egiten die erakunde publiko guztiei, herritar guztiek etxebizitza duina eta egokia izateko duten eskubide subjektiboa betetzen dela bermatzeko. Hain zuzen ere, legearen 21. artikuluak ezartzen du udal etxebizitza tasatuen sustapenek babes sozialeko etxebizitzen ezaugarri eta araubide juridiko berberak izango dituztela, lege horretan, haren erregelamendu garapenean eta udalek horretarako argitaratzen dituzten toki ordenantzetan ezarritako berezitasunekin.
Gaur egungo hirigintza aurreikuspenek kalifikazio hori duten etxebizitzak garatzea aurreikusten dute, eta horrek are gehiago justifikatzen du, ahal izanez gero, araubide juridikoa arautuko duen udal ordenantza espezifiko bat onartzea.
Horrekin batera, araudia prozeduretara egokitu behar da behin behineko eta behin betiko kalifikazioari dagokionez, bai eta obrako eta lehen erabilerako edo okupazioko udal lizentziekin duten erlazioari dagokionez ere (Etxebizitzari buruzko 3/2015 Legearen 28. artikulua eta hurrengoak).
Udal ordenantza honek Anoetako udalerrirako egiten duen zehaztapenak Anoetako Udalari etxebizitza politika propioak ezartzeko aukera emango dio, horrela herritarrei etxebizitza duin eta kalitatezkoa eskuratzeko aukera erraztuz.
Herritar eta erakunde guztiek egoki iritzitako iradokizun, proposamen eta ideiak aurkeztu ahal izango dituzte Anoetako Udalaren web guneko postontziaren bidez.
Argiago gera dadin, aipatutako ordenantzaren testuaren zirriborroa erantsi da.
