Anoetako Udalak deialdi publikoa ireki du zerbitzuarekin urgentziazko prozedura bidez eta etenik gabe jarraitzeko. Helburu nagusia herritarrei, eta bereziki adinekoei, funtsezko gizarte- eta aisialdi-gunea bermatzea da.

Anoetako Udalak Alkartasuna taberna-jatetxearen kudeaketa berria kontratatzeko prozesua abiatu du. Zerbitzuaren gizarte-interesa eta izaera publikoa nabarmena da: herriko erretiratuen bilgune nagusia izateaz gain, gune honek gizarte-kohesioa, sozializazioa eta asoziazionismoa indartzen ditu, anoetarrek herrian bertan aisialdirako eta otorduetarako aukera izan dezaten.

Taberna-jatetxea itxi ez dadin eta zerbitzua bermatzeko, Udalak urgentziazko izapidetzearen aldeko apustua egin du prozedura ireki baten bidez. Horrela, ustiapen-arriskua enpresa esleipendun pribatuak hartuko du, baina Udalak kontrol-ahalmena gordeko du, Alkartasunarako jarduera ekonomiko bideragarria lortzea bermatuz. Gogoratu behar da Udalak ez duela zerbitzu hau zuzenean finantzatzen (erabiltzaileek ordaintzen dituzte kontsumizioak); aitzitik, Udalak kanon bat jasotzen du ustiapenagatik.

Proiektu bideragarria eta baldintzak

Udalak egindako azterketa ekonomikoak argi uzten du negozioaren finantza-iraunkortasuna, udalaren kargura gastu zuzenik sortu gabe. Aurreko urteetako datuetan oinarrituta, 4 langileko plantilla eta establezimenduaren edukiera kontuan hartuta, urteko 167.520 € inguruko fakturazioa estimatzen da (barra, eguneko menuak eta asteburuko otorduak barne). Gastu guztiak kenduta (soldatak, kanona eta gastu orokorrak), urteko 21.800 € inguruko irabazi garbia aurreikusten da. Gainera, esleipendun berriak ez du inbertsio handirik egin beharko lokalean.

  • Kontratuaren iraupena: 2 urteko epea izango du, eta urtez urte luzatu ahal izango da gehienez beste 3 urtez.

  • Kanonaren lizitazio-aurrekontua: 9.000 euro urtean (BEZa barne).

  • Proposamenak aurkezteko azken eguna: Uztailaren 22a, arratsaldeko 14:00etan.

  • Zalantzak argitzeko: Idatzi idazkaritza@anoeta.eus helbidera.

Lokal bakarraren ustiapena denez eta jarduera ezin denez zatitu, kontratua enpresa bakar bati esleituko zaio osorik. Udalak ez duenez jarduera hau bere kabuz emateko baliabide pertsonalik, kanpoko enpresa espezializatu eta kualifikatu bat kontratatuko da prozedura honen bidez.

🔗 Lizitazioan parte hartzeko pleguak eta dokumentazio guztia ikusteko eta proposamenak telematikoki aurkeztek: Euskadiko Kontratazio Publikoaren Plataforma.