Anoetako Udala   

Harituz Tolosaldeko Bertsozale Taldeak udaberrian eskainiko ditu gazte eta helduentzako bertsolaritza tailerrak. Ordu eta erdiko lau saioz osatuta daude tailerrak eta bertsolaritza ezagutu eta bertsotan ikasiz gozatu nahi dutenei zuzenduta daude. Leaburun, Iruran eta Aiztondo bailaran izango dira udaberrian eta dagoeneko zabalik dago horietako izen-ematea.

Bertsolaritzarekiko interesa daukaten eta 16 urte baino gehiago dituzten herritarrek parte hartzeko sortu dituzte tailerrak, izan ezagutzarik ez daukatenentzat nahiz aurrez bertsozale direnentzat. Saioetan, bertsolaritzaren oinarrizko ezagutza eraiki eta bat-batean aritzeko trebetasun minimoak eskuratzea izango da helburua. 

Apuntatzeko epea zabalik egongo da martxoaren 26ra arte. Tailerretan izena eman nahi duenak Irurako kultur etxean, nahiz Aiztondo bailarako liburutegietan izango du horretarako aukera. Tailerren egunak eta ordutegia zehazteko, berriz, parte-hartzailearekin bilduko dira Harituzeko arduradunak eta taldekideei egokien datozkien egun eta orduak aukeratuko omen dituzte.